Unë e di veten që kam rënë në dashuri
kur nis e sajoj fjalë krejt të reja, të pafolura më parë
gëzimologji pasionizim afshografi
epshifikim hypozjarmi pikëllonjë dashurnajë
të them gjëra si “ke trup aq të përqafueshëm”
apo “e dashur, buzët i ke shumë të puthshme”
jam si bishë e trallisur që ka ndezur crack kokainë
i mbytur në dopaminë në norepinefrinë
më ndihmo kur më sheh ashtu se në vete s’jam tamam
më ço në shtëpi mos më lë ashtu se s’di më se ku jam
gjuhëtarët më ndjekin të më djegin në stiva drunjsh
por e dashura ime qesh e më puth e më quan i marrë
emrin e saj kur nis ta përdor në mënyra kreative
për t’ia vjelur tërë valën goditëse
nëse them gjëra si “Parisi do ta ketë shpikur fjalën ‘helenizim’
për ta kapur efektin e Helenës së Menelaut”
unë atëhere veten e di se kam rënë në dashuri
por s’i ndihmoj dot vetes amanet ndihmomë ti
më shkul nga ajo grua butësisht por vendosmërisht
thuaj që tash jam i rrezikshëm për veten e për publikun e gjerë
(sidomos për gjuhëtaret, për to biles as të mos flasim:
më ndjekin netve pa hënë më pjekin mbi stiva drunjsh)
amanet më ndihmo kur më has ashtu se hiç hiç në vete s’jam
më merr më ço në shtëpi mos më lë se vetë s’di ku jam
Shkurtegëza për këtë postim: http://pli.si/1HjBQnD
