Mbahu Teksas

Te kalaja e Harilaçit në Kosovë
Te kalaja e Harilaçit në Kosovë

Ky është flamuri i Teksasit, ku kam kalu një dekadë jetë me studime e punë. Teksasi është shteti i kryetarit amerikan George W. Bush, që vendosmërisht pat thënë se «mjaft domethënë mjaft, Kosova ka me qenë e pavarur».

Ndërsa këtë javë festumë fitoren në zgjedhje dhe përvjetorin e pavarësisë së Dardanisë, bashkatdhetarët dhe miqtë e mi në Teksas u përballën me një stuhi të rrallë dimri.

Të mësuarve me mot të ngrohtë e dimra të lehtë, acari i sivjetëm u çrregulloi përditshmërinë plot punë e gjallëri. Mullijtë e erës janë ngri, rrjeti i shpërndarjes ka ra, gypat kanë pëlcitë, dhe gati gjysma e shtëpive kanë mbetë pa ujë, rrymë e nxemje në temperatura -10 e teposhtë. Kerret nuk kanë as goma dimri, për me ecë nëpër borë, që tanimë ka mbulu plazhet dhe ka përshku bregdetin prej 591 kilometrash nga Luiziana në Meksikë.

«Gjithçka është ma e madhe në Teksas», thonë. Hovi i stuhisë u shumëfishu atje. Por edhe qëndresa do të jetë ma e madhe.

Teksasi, si shtet i fuqishëm e punëtor, pritet të mësojë nga kjo përvojë dhe të ndryshojë shumçka në infrastrukturë dhe shërbime ndaj qytetarëve. Kondicioneri i ajrit thonë u përsos në qytetin e Hjustonit, për t’i ba ballë të nxehtët. Ka njëfarë madhështie perandorake, kujtojnë si në hajgare, me të shti me nirthtë në pikë të verës. Të nirthtët e sivjetit mund ta shtyjë Teksasin me zhvillu teknologji të reja, që mbase do të na i bëjnë ma të lehtë dimrat edhe neve që i përjetojmë ma shpesh.

Teksasi është shteti i dytë me territor e popullsi në ShBA. Ka gati 30 milionë banorë dhe sipërfaqe sa Gjermania e Italia bashkë. Ky shtet amerikan, që dikur ka qenë republikë e pavarur, ka ekonominë e nëntë në botë. Shquhet për veprimtari të llojllojshme, nga bujqësia e nafta te teknologjia informative, financat e shëndetësia.

Metropolet e mëdha si Hjustoni e Dallasi gjenden në Teksas, bashkë me mija shqiptarë, që njihen për restorantet e ushqimit italian, por i gjen padyshim në çdo fushë tjetër.

Populli teksan është bujar. Emri i shtetit rrjedh nga fjala «tajsha», që në gjuhën e një kombi vendas domethënë shok. Shokët e mi në Teksas do ta kalojnë edhe këtë sprovë.

Moti pritet të ndreqet këtë fundjavë, dhe bashkë me motin lajmet që vijnë nga ajo anë e Atlantikut.

Mbahu Teksas! Stay strong, Texas! ¡Mantente fuerte, Texas!

Nga Getoar Mjeku

Njeri i lirë dhe avo­kat prej Prish­tine të Dar­da­nisë. Shkrun për shqip­tarët, gju­hën, histo­rinë, e poli­ti­kën. Lexon çkamos. Ndih­mon me mirë­mbajtë saj­tin për shqip­tari, Plisi.org.